Rusiya paytaxtı meriyasının mədəniyyət departamentinin mətbuat xidmətindən bildirmişlər ki, sentyabrın 15-də Moskvanın mərkəzində Azərbaycanın və SSRİ-nin xalq artisti Müslüm Maqomayevin abidəsi açılacaqdır.
Məlumatda bildirilir ki, abidə bu il fevralın 3-də paytaxtın Yeliseyev və Voznesenski küçələrinin kəsişdiyi yerdə qoyulmuş bünövrəsi üzərində ucaldılmışdır. Abidənin müəllifləri heykəltəraş, Rusiyanın xalq rəssamı Aleksandr Rukavişnikov və Rusiyanın əməkdar memarı İqor Voskresenskidir.
Departamentin mətbuat xidmətinin məlumatına görə, abidənin təntənəli açılış mərasimində paytaxtın hakimiyyət orqanlarının, Moskva Dövlət Dumasının, yaradıcı ziyalıların, Azərbaycan diasporunun nümayəndələri iştirak edəcəklər.