science.gov.az saytından aldığımız xəbərə görə, AMEA-nın Mərkəzi Elmi Kitabxanasında (MEK) “Şollerin arxivi” bədii filminin nümayişi keçirilib.

Film Prezident İlham Əliyevin “Cənubi Qafqaz regionunda alman məskənlərinin salınmasının 200 illiyi haqqında” 2016-cı il 30 avqust tarixli Sərəncamına əsasən çəkilib.

Tədbirdə filmin ssenari müəllifi, quruluşçu rejissoru və baş prodüseri Cəlaləddin Qasımov bildirib ki, triller janrında çəkilmiş ekran əsərinin rejissoru Adil Qulamov, operatoru Fahir Səmədoğlu, montajçısı Faiq Nağıyevdir. Filmdə Xalq artisti Sabir Məmmədov, Əməkdar artistlər Əjdər Zeynalov, Şirzad Pirallahı, aktyorlar Rövşən Kərimduxt, Ramiz Vəliyev və başqaları rol alıblar. Süjet xətti ötən əsrin 40-cı illərində Azərbaycanda yaşamış alman mənşəli Şollerlər ailəsinin həyatı üzərində qurulmuş filmin çəkilişləri Gəncə, Xanlar, Tovuz və Bakıda aparılıb. 

Filmdə alman ailəsinin timsalında insan dramı göstərilib, eyni zamanda, xalqımızın multikultural dəyərlərə sadiq qalması nəzərdən qaçmayıb. Burada baş verən hadisələr real həyatdan götürülüb.

Sonra filmin rejissoru Adil Qulamov, Əməkdar artist Əjdər Zeynalov və digər çıxış edənlər ekran əsərinin süjet xətti, çəkiliş prosesi və baş verən hadisələrdən söz açıblar.

Bir neçə beynəlxalq festivala da təqdim edilən film Kannda Beynəlxalq Film Festivalının kubokunu qazanıb.

İsaq Əmənullayev

“Xalq qəzeti”