Azərbaycan Xalq Cümhuriyyətinin yaranmasının 100 illik yübileyi münasibətilə cari ilin 28 may günü Azərbaycan Respublikasının Küveyt Dövlətindəki Səfirliyinin təşəbbüsü, Küveyt Əmiri Divanının göstərişi və Küveyt Xarici İşlər Nazirliyinin dəstəyi ilə Küveytin azadlıq və müstəqillik simvolu olan “Küveyt qüllələri” üzərində Azərbaycan Respublikasının bayrağının hazırlanmış videoinstalyasiyası təqdim edilmişdir. “Kuwait TV 1” kanalının çəkiliş qrupu tərəfindən lentə alınmış və bu gözəl mənzərəni səfirliyin əməkdaşları, “Vətənsevər” Azərbaycan-Küveyt Mədəniyyət və Dostluq Cəmiyyətinin üzvləri və yerli əhali seyr etmişdir.

Küveyt vətəndaşları televiziya kanalına müsahibə verərək Azərbaycan Xalq Cümhuriyyətinin yaranmasının 100 illik yübileyi münasibətilə qardaş Azərbaycan xalqını və hökumətini səmimi qəlbdən təbrik edərək, Azərbaycana daim sülh və əmin-amanlıq arzu etmişlər. Həmçinin, son zamanlar bir neçə dəfə ölkəmizə səfər etdiklərini, Azərbaycanın çox gözəl bir ölkə və gözəl iqlimə malik olduğunu, son illərdə turizm ölkəsinə çevrildiyini, günü-gündən inkişaf etdiyini, paytaxt Bakı şəhərinin dünyanın ən gözəl şəhərlərindən biri kimi, daim inkişaf etdiyini, xalqımızın çox qonaqpərvər və mehriban olduğunu bildirmiş, Küveyt sakinlərinə Azərbaycana səfər etməyi tövsiyyə etmişlər.

“Xalq qəzeti”