"Veysəloğlu Şirkətlər Qrupu"nun təşəbbüsü ilə "Cinealliance" kinoşirkətinin yaradıcı komandası Azərbaycan Xalq Cümhuriyyətinin 100 illiyinə həsr olunmuş "Cümhuriyyətin 9 şəkli" filminin çəkilişini başa çatdırmışdır.

Filmdə Qafqaz İslam Ordusunun əsgəri və fotoqrafı olmuş sıravi əsgərin vaxtilə çəkdiyi 9 şəkilin tarixcəsindən bəhs olunur. Bu şəkillər Azərbaycan Demokratik Respublikasının doqquz fərqli sahədə əldə edə bildiyi uğurları əks etdirir. Bədii-sənədli xronikada baş vermiş tarixi hadisələrə bu günün gerçəkliyi prizmasından baxılır.

Filmdəki epizodlar baba ilə nəvənin timsalında iki nəslin AXC  tarixinə öyünclü münasibəti fonunda cərəyan edir. Hər iki nəsil oz şanlı tarixinə hörmət edir, AXC irsini yüksək dəyərləndirir. Tamaşaçı yəqin edir ki, yalnız belə bir mənəvi mühit vətənə sadiq əsgər yetişdirə bilər. Filmin qəhrəmanı olan uşaq da məhz babası kimi əsgər olmaq arzusu ilə böyüyür.

R.TAHİR,

“Xalq qəzeti”