Türkiyədə təşkil edilmiş  X Kitab sərgisində Azərbaycan ədəbiyyatını təmsil edən yazıçı – jurnalist Oqtay Hacımusalı  “Azərbaycan sovet ədəbi tənqidi və Mir Cəlal Paşayev” mövzusunda çıxış edib. Kocaeli Böyükşəhər bələdiyyəsinin həyata keçirdiyi sərgi çərçivəsində çıxış edən yazar bildirib ki,  qardaş ölkədə yaşayan ədəbiyyatsevərlərə Mir Cəlal yaradıcılığının müxtəlif aspektləri ilə bağlı məlumat verib, məruzədə  Mir Cəlal imzasının Azərbaycan ədəbi tənqidindəki rolundan bəhs edib: “Azərbaycan ədəbiyyatşünaslığında özünəməxsus yeri olan Mir Cəlal yaradıcılığı ilə bağlı türkiyəli oxuculara məlumat verərkən, onun yazdığı monoqrafiyalardan, elmi məqalələrdən sitatlar gətirib ədəbiyyatımızda açdığı elmi – nəzəri dolğunluq cığırını da diqqət mərkəzində saxlamağa çalışdım. Mir Cəlal haqqında məruzə etməyin əslində nə qədər məsuliyyətli bir iş olduğunun fərqində idim, çünki, məruzəmdə də qeyd etmişdim ki, ədəbi tənqidimiz və ümumilikdə ədəbiyyatımız onun əsərlərindən çox şey öyrənib və bu gün də öyrənməkdədir. ”.

Yazar Azərbaycan ədəbiyyatı ilə bağlı belə silsilə məruzələri gələcəkdə də qardaş ölkədə davam etdirəcəyini söyləyib.

Əfsanə BAYRAMQIZI,
“Xalq qəzeti”