Diasporla İş üzrə Dövlət Komitəsindən verilən məlumata görə, festival mayın 14-dən 17-dək  keçiriləcək.  Həmyerlimiz  Adilə Əliyevanın adını daşıyan pianoçuların XII  beynəlxalq festivalı Azərbaycan Xalq Cümhuriyyətinin 100-cü ildönümünə həsr olunacaq. Fransada yaşayan soydaşımız Adilə Əliyevanın  adını  daşıyan  nüfuzlu beynəlxalq musiqi müsabiqəsinin keçirilməsi ənənə halını alıb və Avropanın, həmçinin ABŞ-ın musiqi ictimaiyyətinin böyük marağına səbəb olub.

İndiyədək bu müsabiqənin qalibləri Doyçe qramofon, Soni, Fransa radiosu, Nyu-York filarmoniyasının orkestri, Karneqi holl və digər bu kimi nüfuzlu qurumlardan, İngiltərə, Almaniya və Avstriyadan dəvətlər alıb, Parisdə ödənişsiz təhsil almaq imkanı qazanıb və yaxşı təaqüdlə təmin olunublar.

Uzun illərdir  Fransada keçirilən müsabiqə öz imkanları çərçivəsində,  Azərbaycan da daxil olmaqla,  dünyanın müxtəlif ölkələrindən olan istedadları üzə çıxarır, onları tanıdır və gənc musiqiçilərin  təhsilini davam  etdirməyə şərait yaradır.

Qeyd edək ki,  Adilə Əliyeva adına pianoçuların XI beynəlxalq müsabiqəsi ötən ilin may ayında Cenevrə şəhərində keçirilib. Azərbaycanın Əməkdar artisti A.Əliyeva Fransa Ali Beynəlxalq Musiqi Akademiyasının direktorudur. Hazırda Fransada yaşayan musiqiçi Bakıda anadan olub, sonradan Moskvaya köçərək bu şəhərdə Çaykovski adına Konservatoriyanı bitirib. İyirmi  beş  ilə yaxındır ki, Fransada yaşayan A.Əliyeva 50-dən çox ölkənin konsert salonlarında çıxış edib, 30-dan artıq disk buraxıb. Adilə Əliyeva hər il Azərbaycanın ali və orta musiqi məktəblərində ustad dərsləri verir.

M.MÜKƏRRƏMOĞLU,
“Xalq qəzeti”