Beynəlxalq Muğam Mərkəzində mütəmadi olaraq milli musiqilərlə yanaşı, maraqlı etnik musiqi konsertləri də təşkil edilir. Muğam Mərkəzinin "Etnik musiqi inciləri" layihəsi çərçivəsində Rumıniya, Moldova, Türkiyə, Yunanıstan, Mərakeş və başqa ölkələrdən gəlmiş etnik musiqiçilərin konsertləri uğurlu olub.

Mayın 4-də Beynəlxalq Muğam Mərkəzinin səhnəsində Perudan təşrif buyuracaq musiqiçilər Azərbaycan muğam ifaçıları ilə birlikdə çıxış edəcəklər. Konsert Avropa İttifaqının Azərbaycandakı nümayəndliyinin təşkilati və Beynəlxalq Muğam Mərkəzinin dəstəyi ilə 2-ci "IMAGINE" Avropa tolerantlıq festivalı çərçivəsində keçirilir.

"Charango meets Mugam" adlı konsertdə perulu iki ifaçı -Karl Struyf və Aleksandro Riva Azərbaycanın əməkdar artistləri Sahib  Paşazadə (tar), Toğrul Əsədullayev (kamança), eləcə də istedadlı xanəndə Nisbət Sədrayeva ilə birlikdə çıxış edəcəklər.

Qeyd edək ki, Çaranqo qədim simli  musiqi alətidir və Latın Amerikası musiqisini müşayiət etmək üçün istifadə edilir. Əsasən kişi ifaçıların istifadə etdiyi Çaranqo xarıcı görünüşünə görə gitaraya bənzəyir, 10 simi var. İki oktavaya qədər diapazonu olan alətlə geniş musiqi repertuarını müşayiət etmək imkanına malikdir.

M.MÜKƏRRƏMOĞLU,
“Xalq qəzeti”