Paleolit dövründə dəniz səviyyəsi çox aşağı olduğu üçün indiki Berinq boğazı quru sahə olub.

ABŞ-ın Alyaska ştatının Sun River bölgəsində aparılan arxeoloji qazıntılar zamanı tapılan cəsəd qalıqları Amerika tarixinə dair bu günədək bilinməyən məqamları üzə çıxarıb.

Altı həftəlik körpə qız uşağına aid olduğu deyilən skelet üzərində araşdırma aparan alimlərin gəldiyi qənaətə görə, bu torpaqlara ilk insanlar Rusiyanın Sibir bölgəsindən gəliblər: "Onlar yerli amerikalılar olan hinduların ulu babalarıdır və Amerika qitəsinə 20 min il əvvəl uzaq Sibirdən gəliblər". Bu barədə Sputnik  xəbər yayıb. Sputnik Azərbaycan "Euronews"-a istinadən xəbər verir ki, paleolit dövründə dəniz səviyyəsi çox aşağı olduğu üçün indiki Berinq boğazı quru sahə olub. Amerika qitəsi və Asiya bir-birinə quru torpaqla birləşib. İnsanlar bu yoldan istifadə edərək Amerikaya keçiblər.

Professor Eske Uillerslev və onun alim həmkarları qeyd edib ki, altı həftəlik körpə qız uşağına aid cəsəd qalıqları bu günədək Alyaskada tapılan ən qədim insan qalığıdır.

M.MÜKƏRRƏMOĞLU,

“Xalq qəzeti”