“Azər-İlmə” Xalçaçılıq Mərkəzinin və AMEA Rəyasət Heyətinin birgə təsisçiliyi ilə nəşr olunan “Azərbaycan xalçaları” jurnalının 25-ci sayı işıq üzü görüb. Sənətşünaslıq və tarix ixtisasları üzrə Azərbaycan Respublikası Prezidenti yanında Ali Attestasiya Komissiyasının elmi nəşrləri sırasında olan jurnalda rəsmi xronika, sənətşünaslıq, tarixşünaslıq, müxtəlif xalq tətbiqi sahələrini əhatə edən müəllif yazıları, reportajlar, elmi məqalələr, maraqlı tərcümə materialları yer alıb.

www.science.gov.az saytı yazır ki, jurnalda Azərbaycan Xalq Cümhuriyyətinin 100 illiyi və Naxçıvan şəhərinin 2018-ci il üçün İslam mədəniyyətinin paytaxtı elan edilməsi  ilə bağlı silsilə yazılar, həmçinin “Araz-Türk respublikasının yaranması və bölgənin erməni işğalından qorunması uğrunda mübarizəsi”, “Naxçıvan xalçaçılığı: ənənə və müasirlik”, “Sirabçay və Naxçıvançay vadisinin qədim mədəniyyətləri”, “Qarabağ elatlarının təsərrüfat həyatından” və digər mövzularda məqalələr dərc edilib.   

Əlipənah BAYRAMOV,
“Xalq qəzeti”